Haradinaj: S’ka ndarje të Kosovës

Kryeministri i Kosovës, Ramush Haradinaj, i ka quajtur spekulime pretendimet e Sava Janjiqit se ka pasur skenarë për ndarjen e Kosovës. Janjiqi ka thënë se kishte parë skenarë, sipas të cilëve do të krijoheshin trazira në veri që të largonin serbët nga atje.

Haradinaj ka thënë se nuk do të ketë ndarje dhe se territori i Kosovës është i pacenueshëm, e kanë dëshmuar me deklarata edhe krerë të lartë të NATO-s, përcjell albinfo.ch.

Këto deklarime i ka bërë gjatë vizitës në kampin Bondsteel, të cilin e ka cilësuar si garanci të paqes dhe të sigurisë jo vetëm për Kosovën, por për gjithë rajonin.

Por, nuk ka dashur të flasë për të ardhmen e Forcës së Sigurisë së Kosovës nëse ajo do të arrijë gjatë vitit 2018 të bëhet ushtri.

Në anën tjetër, komandanti i kampit Bondsteel, Nick Ducich, u ka bërë thirrje serbëve të Kosovës të mos largohen nga FSK-ja, duke i cilësuar si presione të papranueshme ndikimet që u janë bënë serbëve që janë larguar tashmë nga FSK-ja.

Ai ka shtuar se ka takuar shumë serbë, të cilët janë të gatshëm të bëhen pjesë e FSK-së. Komandanti Ducich nuk ka dashur t’i komentojë deklaratat e Janjiqit për ndarje të Kosovës, duke thënë se këto janë çështje politike.