Helikopterët e ushtrisë zvicerane ndihmojnë në shuarjen e zjarreve në Greqi

Keystone

Ushtria zvicerane po ndihmon Greqinë për të luftuar zjarret në pyje në zonën kufitare me Bullgarinë dhe Turqinë. Të shtunën në mëngjes, tre helikopterë Super Puma u ngritën nga Locarno, në kantonin jugor Ticino, drejt Greqisë.

Departamenti Federal i Mbrojtjes publikoi një deklaratë në Twitter, duke thënë se mbi 20 anëtarë të forcave të armatosura zvicerane fluturuan në bordin e helikopterëve të mëdhenj për në vendin e Evropës Juglindore. Personat e dërguar janë specialistë të zjarrfikësve, shkruan swissinfo, përcjell albinfo.ch.

Parku kombëtar Dadia në Greqinë lindore është djegur prej gati dy javësh. Sipas disa vlerësimeve nga Brukseli, ky është zjarri më i madh pyjor i regjistruar ndonjëherë në Bashkimin Evropian. Që nga mesi i gushtit, 20 persona kanë humbur jetën në zjarret pranë kufirit turk.

Aeroplanë të shumtë zjarrfikës nga vendet e BE-së, si dhe qindra zjarrfikës dhe vullnetarë janë në punë. Problemi më i madh është se zjarret po shpërthejnë tani në terrene të pakalueshme dhe flakët mund të luftohen pothuajse ekskluzivisht nga ajri, tha një oficer i brigadës së zjarrfikësve për radion greke të mërkurën e kaluar.