Shqipëria ka shprehur mbështetjen dhe solidaritetin e saj me Francën pas sulmeve të rënda kibernetike, të cilat, sipas autoriteteve, janë kryer nga një strukturë sulmuese e lidhur me Gardën Revolucionare Islamike të Iranit.
Ministri për Evropën dhe Punët e Jashtme, Ferit Hoxha, deklaroi se Shqipëria e kupton nga përvoja e saj seriozitetin e kërcënimeve të tilla, pasi edhe vendi ynë ishte përballur me sulme të ngjashme në vitin 2022, të atribuuara aktorëve shtetërorë iranianë.
Përmes një reagimi, Hoxha theksoi se sulmet kibernetike të mbështetura nga shtete përbëjnë një kërcënim serioz për sigurinë dhe funksionimin e institucioneve dhe shoqërisë, ndaj nuk duhet të pranohen si një realitet i zakonshëm apo të mbeten pa përgjegjësi.
Ai nënvizoi se goditja e infrastrukturës kritike cenon drejtpërdrejt sigurinë e një vendi, pavarësisht nëse realizohet përmes mjeteve fizike apo sulmeve digjitale.
Në këtë kontekst, kryediplomati shqiptar bëri thirrje që vendet evropiane të forcojnë bashkëpunimin, të rrisin kapacitetet e përbashkëta për përballimin e kërcënimeve kibernetike dhe të kërkojnë llogari nga përgjegjësit.
Sipas Hoxhës, uniteti dhe qëndrueshmëria e Evropës janë thelbësore për t’iu përgjigjur sfidave të sigurisë që vijnë nga sulmet e kësaj natyre.
