I riu nga Kosova, Adrian Simnica, mban fjalim në Bundestagun Gjerman

Shqiptari nga Kosova përzgjidhet në programin prestigjioz “Jugend und Parlament”, duke përfaqësuar të rinjtë në zemër të politikës gjermane.

Një tjetër histori suksesi e një të riu shqiptar po shkruhet në Gjermani. Adrian Simnica, me prejardhje nga Kosova, është përzgjedhur si pjesëmarrës në programin prestigjioz “Jugend und Parlament” (Rinia dhe Parlamenti), i cili organizohet në Berlin dhe u mundëson të rinjve të njihen nga afër me proceset vendimmarrëse politike në Gjermani, transmeton albinfo.ch.

Pjesëmarrja në këtë program konsiderohet një privilegj i veçantë, pasi mbledh të rinjtë më të angazhuar dhe më premtues nga vende dhe komunitete të ndryshme, duke u ofruar atyre mundësinë të simulojnë punën parlamentare dhe të kontribuojnë me idetë e tyre në diskutime me rëndësi politike dhe shoqërore.

Për Adrian Simnicën, kjo përvojë përfaqëson një hap të rëndësishëm në angazhimin e tij publik dhe qytetar. Ai pati mundësinë të mbajë edhe një fjalim në Bundestagun Gjerman, duke përcjellë mesazhe për rolin dhe potencialin e brezit të ri në shoqëri.

Pavarësisht moshës së re, Simnica tashmë mban disa pozita me përgjegjësi të rëndësishme shoqërore dhe politike në Nordrhein-Westfalen (NRW), një nga rajonet më të mëdha të Gjermanisë, me rreth 600 mijë banorë në zonën ku ai vepron.

“Të përfaqësosh të rinjtë në një arenë të tillë nuk është vetëm nder, por edhe një përgjegjësi e madhe për të treguar se brezi i ri ka ide, guxim dhe fuqi për të sjellë ndryshime pozitive”, është shprehur ai.

Përzgjedhja e Adrian Simnicës në këtë program prestigjioz konsiderohet një arritje e rëndësishme jo vetëm për të personalisht, por edhe për komunitetin shqiptar në Gjermani, duke dëshmuar rolin gjithnjë e më aktiv të të rinjve shqiptarë në institucionet dhe jetën publike evropiane./Albinfo.ch

https://www.facebook.com/share/v/1JcULTvRjK/?mibextid=wwXIfr

 

---