Incidentet e ekstremit të djathtë në Austri shënojnë rritje prej gati 10%

Numri i incidenteve të lidhura me ekstremizmin e djathtë në Austri vazhdoi të rritej gjatë gjysmës së parë të vitit.

Sipas një përgjigjeje parlamentare të Ministrit të Brendshëm Gerhard Karner (ÖVP) drejtuar deputetes së SPÖ-së, Sabine Schatz, midis janarit dhe qershorit u regjistruan 862 incidente të tilla – një rritje prej gati 10 për qind krahasuar me të njëjtën periudhë të vitit të kaluar, kur ishin regjistruar 787. Kjo e vendos gjysmën e parë të vitit në përputhje me trendin e viteve të fundit.

Në vitin 2023 u regjistruan 1.208 incidente të tilla, të ndjekura nga 1.486 në vitin 2024 dhe 1.986 vitin e kaluar.

Nga incidentet e klasifikuara si të ekstremit të djathtë, 761 kishin motivim të qartë të ekstremit të djathtë, 55 ishin raciste, 26 antisemite dhe 12 islamofobe, thuhet në përgjigje.

Në total, në nivel kombëtar u regjistruan 1.004 raste gjatë gjysmës së parë që lidheshin me incidente të ekstremit të djathtë, ksenofobe, raciste, anti-myslimane ose antisemite.

Rastet e raportuara në bazë të Ligjit për Ndalimin e Nacional-Socializmit shënuan rritjen më të ndjeshme, duke kaluar nga 785 në 887. Rreth 90 për qind e këtyre incidenteve u atribuohen burrave.

SPÖ dhe Të Gjelbrit kërkojnë veprim të shpejtë

“Nuk duhet të mësohemi me idenë se incidentet dhe dhuna e ekstremit të djathtë vazhdojnë të rriten. Fanatikët e ekstremit të djathtë përbëjnë rrezik për sigurinë dhe demokracinë tonë,” tha Schatz, raporton theinternational. “Krahas një qëndrimi të ashpër ndaj ekstremit të djathtë, na duhet parandalim efektiv, edukim qytetar dhe mbështetje për viktimat.”

Duke pasur parasysh shifrat në rritje, ajo bëri thirrje për zbatimin e shpejtë të Planit Kombëtar të Veprimit të Austrisë kundër Ekstremizmit të Djathtë.

Ky plan do të “sjellë masa konkrete”, tha Schatz. Plani pritet të finalizohet këtë dimër dhe synon të përmbledhë masat kundër ekstremizmit të djathtë në fushat e arsimit dhe mbështetjes së demokracisë, parandalimit dhe zbulimit të hershëm, si dhe ndjekjes penale dhe riintegrimit, transmeton albinfo.at.

Edhe Të Gjelbrit po bëjnë presion për zbatimin e këtij plani veprimi.

Lukas Hammer, zëdhënësi i partisë për çështjet e ekstremizmit të së djathtës ekstreme, u shpreh i pakënaqur me draftin fillestar të qeverisë: “Prezantimi i parë i planit të veprimit të shpallur nga qeveria federale ishte i pamjaftueshëm: shumë diskutime të përgjithshme dhe pak masa konkrete e ambicioze. Tani na duhet një plan veprimi që mbështetet te zhvillimet dhe kërcënimet reale.” Ai theksoi se si bazë për këtë duhet të shërbente raporti i Qendrës së Dokumentacionit të Rezistencës Austriake (DÖW).

DÖW: Një trend që bie qartë në sy

Drejtuesi i DÖW-s, Andreas Kranebitter, deklaroi lidhur me rritjen e numrit të incidenteve: “Ashtu siç duhet të jetë e qartë për të gjithë pas kësaj vere se njeriu bëhet qesharak nëse mohon ndryshimet klimatike të shkaktuara nga njeriu, po aq qesharak bëhet edhe nëse mohon rritjen dhe agresivitetin në rritje të së djathtës ekstreme. Këto zhvillime po ndodhin para syve të të gjithëve ne.”

---