Iniciativë për ndalimin e kebabit!

Kjo lloj buke e mbushur me mish “shkatërron kulturën zvicerane të të ushqyerit”, ka arsyetuar iniciativën e tij Daniel Graf duke bërë një aluzion dhe lojë fjalësh me iniciativën për ndalimin e burkave

Një autor i njohur zviceran i reklamave (ekspert i PR) ka dalë me një iniciativë interesante: ndalimin e kebabit (döner kebab). Pasi që kjo lloj buke e mbushur me mish “shkatërron kulturën zvicerane të të ushqyerit”, ka arsyetuar iniciativën e tij Daniel Graf duke bërë një aluzion dhe lojë fjalësh me iniciativën për ndalimin e burkave që është tash aktual në Zvicër.

Graf me këtë “iniciativë” satirike në fakt i kundërvihet SVP-së në debatin e saj lidhur me mbulesën islamike për gratë. Ai thotë se për këtë iniciativë është bindur pasi që SVP edhe një herë ia doli ta dominojë në atë mënyrë temën e debatit sa që vetëm argumentet e saj pinë ujë.

“Kundër një fantomi sikur është burka, ne nuk kemi asnjë shans”, sqaron ai. Cilido që dëshiron të shprehet rreth burkave, duhet patjetër të thotë edhe diçka për terrorizmin. Ndërsa Graf synon që debatin ta nxjerrë nga qorrsokaku me një ide që më shumë të kujton satirën: Në vend se për ndalimin e burkës, duhet debatuar për ndalimin e kebapit.

I njohur si autor fushatash propagandistike, Graf duket ta ketë menduar seriozisht këtë punë. Ai tashmë ka përpiluar edhe tekstin e iniciativës në të cilin ka futur edhe ndryshimin që duhet të pësojnë enent përkate¨se të kushtetutës, pas votimit të iniciativës.

Se bëhet fjalë për një iniciativë të natyrës satirike mund të shihet edhe në pjesën e tekstit në vazhdim.

“Kushtetuta Federale duhet të ndryshojë si vijon:

Neni 10a Ndalimi bukëve të mbushura me mish;

1.Askush nuk guxon t`i konsumojë bukët e mbushura me mish në ambientin publik dhe në vendet që kanë qasje publike apo ato në të cilat ofrohen shërbime nga cilido…”

Graf thotë se do të startojë me iniciativën posa t`i mbledhë 50 mijë nënshkrime.