Instituti i Shëndetësisë: Kosova nuk ka koronavirus

Instituti Kombëtar i Shëndetësisë Publike të Kosovës (IKSHPK) ka bërë të ditur se deri tani në vend nuk është raportuar asnjë rast i të prekurve me koronavirus.

Ata këtë e bënë të ditur me anë të një publikimi në rrjetin social Facebook.

“Instituti Kombëtar i Shëndetësisë Publike po përcjell në mënyrë aktive situatën epidemiologjike me sëmundje ngjitëse në tërë territorin e Republikës së Kosovës, e në veçanti është duke monitoruar nga afër epideminë e sëmundjes respiratore të shkaktuar nga një koronavirus i ri i identifikuar për herë të parë në Wuhan, Provinca Hubei, Kinë”.

“Duke u bazuar në situatën aktuale epidemiologjike, informatat nga terreni, përgatitjet e institucioneve shëndetësore për t’u përballur me rastet eventuale të koronavirusit, mungesa e linjave ajrore direkte me Kinën, rreziku për depërtimin eventual të virusit në Kosovë vazhdon të mbetet i ulët”, ka shkruar IKSHPK.