Një operacion ndërkombëtar i udhëhequr nga INTERPOL-i kundër trafikimit të paligjshëm të armëve në Evropë dhe Azinë Qendrore ka rezultuar me sekuestrimin e mijëra armëve të zjarrit, eksplozivëve dhe municioneve.
Sipas raportimeve të “Euronews”, gjatë operacionit të koduar “Trigger X”, i cili u zhvillua nga 22 qershori deri më 5 korrik, autoritetet sekuestruan gjithsej 2 823 armë të vogla dhe të lehta, afro 400 granata dore dhe eksplozivë, si dhe më shumë se 40 mijë fishekë.
Hetimet zbuluan armë që dyshohet se kishin lidhje me konflikte të mëparshme dhe aktuale në Evropën Lindore, Ballkan dhe rajonin e Nagorno-Karabakhut.
Gjatë aksionit u arrestuan mbi 152 persona, të dyshuar për posedim dhe trafikim të armëve, si dhe për përfshirje në veprimtari të tjera kriminale, përfshirë trafikun e drogës, kontrabandën e emigrantëve dhe grabitjet.
Po ashtu, u lokalizuan dhe u ndaluan 15 persona të kërkuar nga autoritetet, mes tyre pesë të arratisur që ishin shpallur në kërkim ndërkombëtar përmes njoftimeve të kuqe të INTERPOL-it.
Një nga rastet më të rëndësishme u evidentua në kufirin mes Bullgarisë dhe Turqisë, ku u zbuluan dy kamionë të rëndë që transportonin mbi 1 000 armë të kategorisë ushtarake.
Sipas INTERPOL-it, operacioni vuri në pah rrezikun që armët e mbetura nga konfliktet e armatosura të përfundojnë në duart e organizatave kriminale dhe të përdoren për aktivitete të tjera të paligjshme.
Autoritetet sekuestruan gjithashtu 268 granata dore. Sekuestrimi më i madh i këtij lloji u regjistrua në Serbi, ku u zbuluan 68 granata që dyshohet se po transportoheshin ilegalisht nga Bosnjë-Hercegovina.
Në Serbi u zbulua edhe një punishte e paligjshme, ku armët me gaz dhe ato sinjalizuese modifikoheshin për t’i kthyer në armë zjarri.
Operacioni evidentoi gjithashtu lidhje mes trafikimit të armëve dhe rrjeteve që merren me kontrabandimin e emigrantëve. Në Bullgari, autoritetet sekuestruan 20 varka të fryra që po transportoheshin drejt një shteti të Evropës Perëndimore.
Sipas të dhënave paraprake, kjo dërgesë mund të kishte lidhje me grupe kriminale që lehtësojnë kalimin e paligjshëm të emigrantëve përmes Kanalit të La Manshit.
Gjatë kontrolleve u ndaluan edhe emigrantë pa dokumentacion të rregullt. Njëri prej tyre u gjet në posedim të një pushke automatike dhe disa fishekëve.
Përveç armëve, municioneve dhe eksplozivëve, operacioni çoi edhe në sekuestrimin e lëndëve narkotike, përfshirë kokainë dhe marijuanë, si dhe cigare të falsifikuara, tekstile dhe produkte ushqimore të padeklaruara.
INTERPOL-i, me seli në Lion të Francës, theksoi rëndësinë e bashkëpunimit ndërkombëtar në identifikimin e rrugëve të trafikimit, goditjen e rrjeteve kriminale dhe parandalimin e përhapjes së armëve të paligjshme.
