Ish-kryeministri Bashkim Fino humb jetën pas infektimit me Covid-19

Ish-kryeministri Bashkim Fino ka humbur jetën disa javë pasi po vuante infektimin nga koronavirusi, përcjell albinfo.ch.

Thuhet se Fino, 58 vjeç, ndërroi jetë mëngjesin e sotëm në orën 04.00, thanë zyrtarë të qeverisë.

Bashkim Fino disa vjet më parë vuajti nga një sëmundje e rëndë, të cilën u duk se arriti ta luftonte.

Në mars të vitit 1997 pasi ishte zyrtar lokal në Gjirokastër, ai u thirr nga Ish-Presidenti Sali Berisha për të marrë postin e kryeministrit.

Ishte koha kur shteti thuajse kishte rënë dhe u krijua qeveria e Pajtimit Kombëtar.

Në muajin korrik vijoi me poste qeveritare. Ushtroi detyrën e ministrit të Pushtetit Lokal, njëkohësisht dhe zv.kryeministër deri më 1998.

Më 1999 deri në vitin 2001 do të ishte ministër i Pushtetit Lokal. Gjatë viteve 2001-2002 ka qenë ministër i Punëve Publike dhe Turizmit.

Ndërsa në periudhën 2004, ministër i Rregullimit të Territorit dhe Turizmit.

Prej shumë vitesh ishte deputet i Partisë Socialiste. Edhe për zgjedhjet e 25 prillit ishte kandidat për deputet.

Kryeministri Edi Rama reagoi i shokuar nga vdekja e Finos: “E pabesueshme, po shumë fatkeqësisht e vërtetë, miku im, miku ynë i mirë Bashkim Fino nuk jeton më! Nuk kam fjalë.

Sot për familjen tonë të madhe është një ditë zie, aktivitetet tona elektorale do të ndalen, në nderim e kujtim të vëllait tonë të dashur”.