Ish-presidenti Maurer: Zvicra nuk mund të përballojë një bllokim të dytë

Ai ka thënë se "Zvicra nuk mund të përballojë një bllokim të dytë. Thjesht, nuk kemi para për këtë”.

Në një deklaratë të tij, ministri aktual dhe ish-presidenti zviceran, Ueli Maurer, u ka kërkuar qytetarëve të jenë të përgjegjshëm dhe t’u përmbahen rregullave të bllokimit, duke thënë “Zvicra nuk mund të përballojë një bllokim të dytë. Thjesht, nuk kemi para për këtë”.

Maurer theksoi borxhin në rritje të Zvicrës si një arsye që bllokimi duhet të shmanget, raporton e përditshmja zvicerane 20 Minuten, përcjell albinfo.ch.

Parlamenti zviceran miratoi marrjen e 30 miliardë frangave të borxhit shtesë, nga të cilat qeveria planifikon të shpenzojë afërsisht 18 miliardë.

Për shkak të një rënie në sasinë e të ardhurave, pritet të ketë edhe 22 miliardë franga shtesë borxh në fund të vitit 2020.

Maurer, nga SVP/UDC, parti konservatore e djathtë, ka thënë se të ardhurat nga taksat nuk do të kthehen në nivelet para-pandemike deri në vitin 2024, por gjithashtu tha se një rritje e taksave ishte e panevojshme.

“Ne duhet të gjejmë rrugën tonë për t’u disiplinuar në politikën e shpenzimeve”, ka thënë Maurer.

Zvicra të shkurtojë karantinën?

Maurer, në kuadrin e marrëveshjes për ndarje të pushtetit në Këshillin Federal ka shërbyer si President  në vitin 2013 dhe në 2019, transmeton albinfo.ch. Ai ka përmendur një ndryshim në rregullat e karantinës, si një mënyrë për të minimizuar ndikimet ekonomike.

“Ne jemi duke diskutuar se sa shpejt mund t’i dërgojmë njerëzit me test negativ, edhe nëse ishin në një zonë rreziku, përsëri në ekonomi, përsëri në punë”, tha Maurer.

 

---