Ish refugjati shqiptar kërkon “dhoma gazi” për refugjatët: Dënohet me gjobë

Ai kishte komentuar një artikull që bënte fjalë mbi dhënien e kartelave të sigurimit shëndetësor, refugjatëve. Komenti i tij ishte ky: “Atyre u duhet më shumë një dhomë gazi dhe jo një m... i tillë"

Një shqiptar 23 vjeçar me prejardhje nga Kosova, është dënuar me gjobë për shfryrje të urrejtjes ndaj refugjatëve! Interesantja në këtë lajm është se ai vet, si fëmijë kishte ardhur në Gjermani si refugjat lufte nga Kosova, 17 vite më parë!

Gjykata administrative e Göttingenit ka dënuar atë me 90 njësi ditore nga 15 euro, që gjithsej bëjnë 1350 euro, shkruan hna.de

Sipas zëdhënësit të gjykatës, kosovari, në mars të këtij viti në faqen e facebook-ut të një gazete lokale të Götingenit kishte komentuar një artikull që bënte fjalë mbi dhënien e kartelave të sigurimit shëndetësor, refugjatëve, transmeton albinfo.ch. Komenti i tij ishte ky: “Atyre u duhet më shumë një dhomë gazi dhe jo një m… i tillë…” (dhomë gazi, aludim në kthinat e vdekjes në kohën e nazizmit).

Redaksia e portalit atëbotë, pasi që ishte alarmuar nga lexuesit tjerë, e kishte fshirë menjëherë komentin. Mirëpo, para kësaj, shumë lexues e kishin siguruar atë koment dhe kishin ushtruar kallëzim penal ndaj autorit.

Kosovari e ka kundërshtuar dënimin dhe ka ushtruar ankesë, por edhe gjykata më e lartë i ka vërtetuar dënimin, përcjell albinfo.ch. Ai nuk ishte paraqitur në sallën e gjykimit, por gjithsesi dënimin për urrejtje ndaj refugjatëve duhet ta paguajë: 1350 euro.