ITU: Kosova nuk mund të marrë kodin e vetë

Kosova duhet të bëhet një anëtare e OKB-së ose të arrijë një marrëveshje me Serbinë, përpara sesa t’i jepet kodi i saj telefonik i vendit.

Sanxhi Açaraja, zëdhënës për Bashkimin Ndërkombëtar të Telekomunikacionit (ITU), që është i ngarkuar me trajtimin e çështjes, ka deklaruar se pasi një vend bëhet anëtar i OKB-së, më pas bëhet një anëtar i ITU-së. Pas kësaj, mund të nisin procedurat teknike për të caktuar një kod të vendit.

Açaraja ka deklaruar për SETimes se “problemi i vërtetë është anëtarësimi në OKB”, duke shtuar se procedura duhet të jetë e njëjtë për cilindo vend.

Por çështja nuk është fare kaq e lehtë. Më 2005, administrata e UNMIK-it të Kosovës i kërkoi ITU-së që t’i jepte Kosovës një kod telefonik tregtar.

Por ITU nuk e miratoi kërkesën dhe Kosova vazhdon të përdorë kodin e vendit të Serbisë, 381.

Çështja është tani pjesë e bisedimeve të ndërmjetësuar nga BE, mes Kosovës e Serbisë.

“Çështja e telekomunikacioneve është ende pa marrëveshje … do të vazhdojë të diskutohet në raundet e tjera të dialogut teknik,” ka deklaruar për SETimes Dren Zeka, këshilltar i lartë për kreun e ekipit të Kosovës në dialog, Edita Tahiri.

Zeka, ka deklaruar se për shkak se Kosova nuk është anëtare e ITU-së, ajo përdor kodet e vendeve të tjera.

Qeveria thotë se mungesa e një kodi vendi mund të pengojë zhvillimin ekonomik të Kosovës.

Duke e patur të pamundur që të ketë një kod, Kosova përdor tani tre kode — të Serbisë për telefoninë fikse, kodin e Monakos për operatorin Vala dhe kodin e Sllovenisë për IPKO-n.