Ja përse i është dhënë pasaporta zvicerane kosovarit të dënuar

Në momentin e natyralizimit të Jeton G. në vitin 2000, autoritetet përgjegjëse kantonale nuk kanë pasur qasje në regjistrin penal

Këshilli qeveritar i Cyrihut duke iu përgjigjur një interpelance të SVP-së ka sqaruar arsyen e dhënies së pasaportës zvicerane një kosovari që në fillim të këtij viti ka vrarë një shtetas malazez.

Në momentin e natyralizimit, në vitin 2000, autoritetet përgjegjëse kantonale nuk kanë pasur qasje në regjistrin penal. Një qasje e tillë atyre u është mundësuar vetëm duke filluar nga viti 2008, thuhet në përgjigjen e qeverise së kantonit të Cyrihut, të publikuar të enjten.

Kështu, ato nuk kishin indikacione se kandidati për natyralizim ka qenë i dënuar më parë, shkruan azonline.ch. Kështu, sikur shqiptari nga Kosova (atëbotë 16 vjeçar) do të ishte kandidat për natyralizim në kushtet e sotme, atij, në bazë të të dhënave të disponueshme do t`i refuzohej dhënia e pasaportës zvicerane, transmeton albinfo.ch.

Jeton G., në mars tëkëtij viti kishte vrarë një shtetas malazez, truproje në lokale nate dhe ushtrues sportesh marciale. Vrasja pati bërë bujë të madhe veçanërisht për rrethanën në të cilën Jetoni kishte marrë pasaportën zvicefrane perkundër faktit se kishte pasur një precedencë penale.