Japonezët të interesuar për investime në Kosovë

Charlie Taka, përfaqësues i kompanisë japoneze “California Hills“ u shpreh i gatshëm për të investuar në ndërtimin e objekteve banesore të kualitetit të lartë

Zëvendësministri i Zhvillimit Ekonomik (MZHE), Gani Koci ka pritur në takim kryetarin e kompanisë japoneze “California Hills”, Charlie Taka, e cila është pjesë e “Global Investment Group” , me të cilin ka diskutuar mundësitë e investimeve në Kosovë, në fushën e patundshmërive dhe ndërtimtarisë.

Me këtë rast zëvendësministri Koci ka njoftuar z.Taka për ambientin që ofron Kosova për investime të jashtme, duke shtuar se legjislacioni është mjaft i avancuar dhe krijon kushte të favorshme investimi në këtë fushë.

“Fusha legjislative në Kosovë është e avancuar e sidomos ajo e investimeve. Kosova ofron mundësi të mira për të investuar dhe jemi të angazhuar që të lehtësojmë procedurat për investitorë”, ka thënë Koci.

Në takim, numri dy i MZHE-së ka informuar kreun e kompanisë japoneze me të arriturat e Kosovës në fushën e ekonomisë duke shtuar se fuqizimi i sektorit privat është një ndër prioritet kryesore të Qeverisë.

Nga ana tjetër Charlie Taka, sipas një kumtese të MZHE-së, ka falënderuar zëvendësministrin Koci për informatat dhe është shprehur i gatshëm të investojë në Kosovë në fushën e ndërtimtarisë dhe atë të teknologjisë informative.

“Ne si kompani jemi të interesuar të investojmë në ndërtimin e objekteve banesore të cilat janë të kualitetit të lartë dhe plotësojnë standardet e duhura . Po ashtu ne do t’i përshtatemi tregut të Kosovës sa i përket çmimeve“, tha thënë kryetari i kompanisë “California Hills”.