Javën e ardhshme takimi për stabilizim asocim

Javën e ardhshme mbahet takimi Kosovë – BE për Marrëveshjen e Stabilizim Asocimit.

Komisioni Parlamentar për Marrëveshjen e Stabilizim Asocimit Kosovë – BE do të mbajë takimin e pestë më 17 dhe 18 shtator në Prishtinë.

Ky komisioni përbehet nga dy delegacione: delegacionit parlamentar të Kosovës që kryesohet nga deputeti Memli Krasniqi dhe delegacionit të parlamentarëve evropianë, që kryesohet nga Tonino Picula. 

Për mbledhjen e këtij komisioni, përgatitjen e tij dhe temat që do të diskutohen, sot ka mbajtur takim delegacioni kosovar. 

“Memli Krasniqi, kryesues i delegacionit kosovar, prezantoi temat e mbledhjes se Komisionit Kosovë – BE dhe foli për rëndësinë e shtimit të angazhimit për mbikëqyrjen e zbatimit të Marrëveshjes së Stabilizim-Asocimit. Krasniqi po ashtu theksoi nevojën që të shtohen përpjekjet e të gjithë akterëve politikë në Kosovë në rrugën drejt integrimeve euro-atlantike”, thuhet në njoftimin e kuvendit.

Krasniqi njoftoi se tema të diskutimit në mbledhjen e Komisionit Kosovë – BE do të jenë: raportet Kosovë – BE, dialogu mes Kosovës dhe Serbisë, zhvillimi ekonomik dhe zbatimi i MSA-së, sundimi i ligjit dhe lufta kundër korrupsionit dhe tema të tjera.

Krasniqi ka njoftuar anëtarët e delegacionit se në këtë takim do të flasë edhe kryeministri Ramush Haradinaj, ndërkaq në emër të BE-së, përfaqësuesja për Kosovë, Natalya Apostolova.

 

---