Kantoni ua lejon “pushimin e lindjes” edhe burrave

Por, defekti i këtij pushimi është se, për t`u siguruar ai, është dashur t`u hiqen dy javë pushim të lehonisë grave që lindin

Në kantonin Appenzell Innerhoden, Parlamenti ka votuar në favor të pushimit prindëror me pagesë për meshkujt kur bëhen baballarë. Bëhet fjalë këtu vetëm për të punësuarit në organet e kantonit dhe për pushim prej pesë ditësh, shkruan srf.ch.

Por, defekti i këtij pushimi është se, për t`u siguruar ai, është dashur t`u hiqen dy javë pushim të lehonisë grave që lindin, përcjell albinfo.ch. Kështu, tash e tutje, në vend se të pushojnë 16 javë sa ishte planifikuar të bëhej (nga 14 javë sa ka qenë), nënat do të vazhdojnë të kenë 14 javë pushim të lindjes.

Ky vendim është marrë në kuadrin e një rishikimi të rregullores mbi personelin dhe të punësuarit kantonalë, nga viti 1998. Përshtatjet më të rëndësishme në këtë rishikim bëhen në lidhje me kohën e punës, rregullimin e pushimeve dhe pushimin e etërve me rastin e lindjes së fëmijëve.

Në administratën e Kantonit Appenzell Innerhoden punojnë gjithsej 206 veta.