Kapen dy kosovarë “në të zezë”, njëri me dokumente bullgare

Në kantonin Zug, në dy raste janë kapur me punë dhe qëndrim ilegal dy shtetas kosovarë. Njëri prej tyre kishte dokumente të falsifikuara bullgare

Policia e Kantonit të Zug-ut me rastin e një kontrollimi të bërë në një vendpunishte ndërtimi në Neuheim ka zënë një kosovar 22 vjeçar duke punuar ilegalisht. Pasi ka parë policinë ai është përpjekur të ikë por policët e kanë kapur pas disa metrash. Me këtë rast është konstatuar se ai është me qëndrim ilegal në Zvicër dhe nuk ka leje pune.

Prokuroria shtetërore e kantonit e ka dënuar punëtorin në fjalë me burg efektiv prej 40 ditësh. Ndërkohë, Zyra për Migracion ka vendosur dëbimin e tij nga Zvicra dhe ndalimin e hyrjes në Zvicër pas dëbimit.

Vetëm pak ditë më parë, të hënën, policia e Zug-ut ka zënë edhe një punëtor tjetër në të zezë. Bëhet fjalë për një të ri 23 vjeçar po ashtu nga Kosova. Ai është zënë e rastin e një kontrollimi të automjeteve. Kur i kanë kërkuar dokumentin, ai ka ofruar një leje njoftimi dhe një patentshoferi nga Bullgaria, shkruan infoticker.ch.

Pas kontrollimit me metoda kriminaloteknike është konstatuar se të dy dokumente janë të falsifikuara. Ai ka pranuar se është nga Kosova dhe se punon pa leje si ndihmës transporti.

Prokuroria e shtetit e ka dënuar kosovarin me kusht prej 80 njësi ditore dhe me një gjobë. Ndërkohë, Zyra për Migracion e ka dëbuar atë të enjten në Kosovë. Po kështu i është ndaluar hyrja në Zvicër për tri vite.