Kërcënohet zyrtarja e Komunës së Prishtinës

Komuna e Prishtinës njofton se ka hapur rast në Policinë e Kosovës dhe ka kërkuar nga ta që t’i ndërmarrin të gjitha masat e duhura dhe t’i nxjerrin para drejtësisë kërcënuesit

Komuna e Prishtinës njofton se një grup i udhëhequr nga asambleisti i Vetëvendosjes Eman Rrahmani e ka kërcënuar zyrtaren e Drejtorisë për Investime Kapitale, Irfete Zejneli.

“Sot, në zyrë të Drejtorisë për Investime Kapitale dhe Menaxhim të Kontratave, Eman Rrahmani ka ardhur me një grup prej afro 30 vetash, duke e bllokuar në zyrë zyrtaren komunale, si dhe duke e terrorizuar e kërcënuar atë. Madje, disa prej shoqëruesve të tij kanë hipur mbi tavolina të zyrës dhe e kanë ofenduar zyrtaren komunale në vazhdimësi.

Në incizimin e publikuar nëpër media, shihet Eman Rrahmani me disa prej shoqëruesve të tij, ku njëri nga ta, i mbështetur me karrige për muri, ia pamundëson daljen nga zyra zyrtares në fjalë, duke ia mbyllur shtegun e vetëm të ecjes”, thuhet në reagim.

Komuna e Prishtinës njofton se ka hapur rast në Policinë e Kosovës dhe ka kërkuar nga ta që t’i ndërmarrin të gjitha masat e duhura dhe t’i nxjerrin para drejtësisë kërcënuesit.

Ndërsa, asamblisti Rrahmani ka akuzuar kreun e Prishtinës, Shpend Ahmeti, për të cilin ka thënë se ia ka ndaluar hyrjen në kabinetin e tij. “Qëllimi ishte ta takoj nënkryetarin Selim Pacolli e jo kryetarin. Përveç që është qesharak, ky veprim i tij është edhe i turpshëm në çfarë gjendje ka ardhur”, ka shkruar ai.