Këshilli Federal, masa kundër diskriminimit të grave në paga

Këshilli Federal i Zvicrës planifikon që të gjitha ndërmarrjet me më shumë se 50 punëtorë t`i obligojë për të bërë analizat e të ardhurave

KEYSTONE/ Lukas Lehmann

Për të luftuar diskriminimin e femrave sa u përket pagave, Këshilli Federal i Zvicrës planifikon që të gjitha ndërmarrjet me më shumë se 50 punëtorë t`i obligojë për të bërë analizat e të ardhurave, shkruan srf.ch. Qeveria po ashtu, përkundër kritikave që pati gjatë shqyrtimit në parlament, këmbëngul në masat e propozuara kundër diskriminimit të gruas, gjegjësisht kundër pagave më të ulëta që marrin ato për punën e njëjtë që kryejnë.

Sipas propozimit, të gjitha ndërmarrjet me numrin e përmendur të të punësuarve duhet që për çdo katër vjet të bëjnë një analizë të pagave dhe të kontrollohen nga revizori, transmeton albinfo.ch. Rezultatet e këtyre si dhe përmasat e diskriminimit, ato duhet t`ua prezantojnë pastaj të punësuarve të tyre.

Parimi për barazinë e të ardhurave në mes gjinive është vendosur në kushtetutën federale që nga viti 1981. Mirëpo, edhe përkundër kësaj, pabarazia ka vazhduar. Kështu, në vitin 2012 dallimi në të ardhura në mes burrave dhe grave ka qenë 8.7 për qind ose 680 franga në muaj në dëm të grave.