Konferenca e jashtëzakonshme, reagon Kelmendi: Kam punuar në vija të njëjta me UÇK-në

Ai ka thënë se në kohën e luftës i ka mbajtur të informuar UÇK-në dhe spektrin politik të Kosovës

Ushtruesi i detyrës së Kryeprokurorit të Shtetit, Besim Kelmendi, ka thirrur konferencë të jashtëzakonshme pas intervistimit nga Prokuroria Speciale lidhur me rastin e masakrës së Reçakut.

Në një konferencë për media të thirrur pasi që është intervistuar nga Prokuroria në cilësinë e dëshmitarit për masakrën Reçakut, ai ka mohuar se ka qenë ndonjëherë asistent i gjyqtares serbe Danica Marinkoviq, e cila ka qenë e ngarkuar nga regjimi serb “ta hetojë” masakrën e Reçakut.

“Mua më vije mirë që kam dhënë një deklaratë para Prokurorisë Speciale që konfirmon gjithë atë që po them para jush. Kurrë në jetën time deri në vitin 2001 nuk kam qenë në fshatin Reçak. Kurrë nuk kam qenë as gjyqtar as prokuror para vitit 2000”, tha ai, transmeton albinfo.ch.

Kelmendi tha se shkrimi i sotëm i botuar në një portal, është shpifje dhe dezinformatë.

“Kam lindur më 1962 dhe jam punësuar më 1986 në Gjykatën e Qarkut në Prishtinë. Në kohën kur vendosej për pavarësinë e Kosovës kishte përpjekje dhe kërkesa që dikush të shkatërronte komplet popullin shqiptar dhe ne që ishim pjesë e asaj kohe kishim një detyrë, edhe në punëtorët shqiptarë në gjykatë isha bashkëpunëtor profesional, është titull profesional i punës, nuk ka lidhje me bashkëpunim me regjime dhe parti. Gjatë asaj kohe kisha një aktivitet në Sindikatën e Punëtorëve të asaj gjykate. S’ka veprim, aktivitet që kanë qenë në kuadër të sindikatës në nivel Kosove që nuk e ka përkrahur sindikatën ku kam qenë unë”, është shprehur Kelmendi.

Ai ka thënë se në kohën e luftës i ka mbajtur të informuar UÇK-në dhe spektrin politik të Kosovës.

“Në atë kohë për çdo që i duhej UÇK-së dhe spektrit politik të Kosovës, jam unë ai që i kam mbajtur jo vetëm të informuar por kam rrezikuar punën dhe jetën për të dërguar dosje atje ku e kishin vendin”, ka theksuar Kelmendi.

---