Konfirmohet aktakuza, Presidenti i Kosovës jep dorëheqje

Keystone (AP Photo/Astrit Ibrahimi)

Pas Kadri Veselit, edhe presidentit Thaçi i konfirmohet aktakuza nga Gjykata Speciale, shkruan albinfo.ch.

Në konferencën e tij të mbajtur, ai konfirmoi aktakuzat dhe dha dorëheqje nga posti i Presidentit.

“Para pak çasteve jam informuar prej njerëzve kompententë se zyrtarisht gjykatësi ka konfirmuar aktakuzën ndaj meje”, ka thënë Presidenti Thaçi para mediave.

“Nuk do të lejoj në asnjë rrethanë që para gjyqit të dalë presidenti i Republikës së Kosovës”, tha ai.

“…Për të mbrojtur integritetin e Presidencës, shtetit të Kosovës, qytetarit të Kosovës, popullit të Kosovës dhe duke respektuar partneritetin me bashkësinë ndërkombëtare sot jap dorëheqje nga pozita  e presidentit të Republikës së Kosovës”, tha ai.

Thaçi më tej tha se ndihet krenar me përgjegjësitë që ka bartur në tri dekada në pozicione të ndryshme institucionale.

Ish presidenti Thaçi kërkoi nga forcat politike që në këto rrethana të reja të dëshmojnë maturinë që kërkon koha, në mënyrë që vendi të mos thellohet në krizë kushtetuese e institucionale.

“Interesat e shtetit të jenë mbi ato personale dhe partiake”, u shpreh Thaçi, duke shtuar se vendi nuk ka kohë për të humbur dhe duhet të ruhet orientimi euro-atlantik i shtetit dhe shoqërisë.

Dorëheqje nga politika sot ka dhënë edhe kreu i PDK-së, Kadri Veseli, pasi edhe atij i është ngritur aktakuza.

Bashkë me Thaçin e Veselin, deri tash dihet se u është konfirmuar aktakuza edhe deputetit Rexhep Selimi dhe ish-kryeparlamentarit Jakup Krasniqi.