“Kafe me Diasporën” në Bonn

Bashkatdhetarët ftohen të marrin pjesë në një bashkëbisedim të hapur për çështjet dhe interesat e komunitetit shqiptar në Gjermani.

Konsullata e Përgjithshme e Republikës së Kosovës në Dyseldorf ka ftuar të gjithë bashkatdhetarët që jetojnë dhe veprojnë në Gjermani të marrin pjesë në takimin “Kafe me Diasporën”, i cili do të mbahet në qytetin e Bonnit, transmeton albinfo.ch. 

Sipas njoftimit të Konsullatës, aktiviteti synon të krijojë një hapësirë të hapur për komunikim, shkëmbim mendimesh dhe diskutim të temave me interes për komunitetin shqiptar në diasporë.

Përmes këtij takimi, përfaqësuesit diplomatikë synojnë të forcojnë bashkëpunimin me mërgatën, të dëgjojnë idetë, sugjerimet dhe shqetësimet e bashkatdhetarëve, si dhe të nxisin dialogun në një atmosferë miqësore dhe të afërt.

Takimi do të mbahet më 17 qershor 2026, duke filluar nga ora 18:00, në lokalin Cafe 5 Senses, në Bonn-Bad Godesberg.

Konsullata ka bërë thirrje që sa më shumë qytetarë të marrin pjesë në këtë aktivitet, duke e konsideruar atë si një mundësi të mirë për të diskutuar çështje të rëndësishme që lidhen me jetën dhe angazhimin e diasporës kosovare në Gjermani./Albinfo.ch 

---