Kosova ‘goditet’ nga lëndimet

Hekuran Kryeziu ishte gjithmonë titullar te Kosova dhe te skuadra zvicerane Zurich

Kosova ka më shumë se një vit që nuk ka humbur asnjë ndeshje në futboll. Në 12 ndeshje është pa humbje, ku ishte e para në grupin e saj në Ligën e Kombeve, derisa kualifikimet i nisi me një barazim ndaj Bullgarisë, kurse paraprakisht barazoi me Danimarkën në miqësore, shkruan albinfo.ch.

Por, ‘Dardanët’ kanë marrë disa lajme jo të mira, për shkak të lëndimeve të lojtarëve.

I fundit ishte Hekuran Kryeziu, i cili ka këputur ligamentet dhe do të mungojë sigurt gjashtë muaj, derisa në varësi të riaftësimit mund të shkojë deri në nëntë.

Kryeziu ishte gjithmonë titullar te Kosova dhe te skuadra zvicerane Zurich.

Pak kohë më parë u operua edhe Valon Berisha, për shkak të një problemi në gju dhe e ka humbur këtë sezon me Lazion, derisa vështirë se do të jetë edhe për ndeshjet e qershorit me Kosovën, ndaj Malit të Zi dhe Bullgarisë.

Bersant Celina gjithashtu nuk ka luajtur që disa ndeshje, megjithatë, mesfushori i Swansea, nuk ka ndonjë lëndim të rëndë. Gjithashtu në ndeshjen e fundit u lëndua edhe Leart Paçarada.

Megjithatë, lajm i mirë është rikthimin në fushën e blertë për Benjamin Kolollin.

---