Kosova mposht Omanin 1:0, shkruan historinë

Golin për Kosovën e shënoi Imran Bunjaku nga pika e bardhë në minutën 84 të lojës. Kjo fitore rikthen shpresat pas dy humbjeve rresht

Përfaqësuesja e Kosovës në Futboll e mposhti reprezentacionin e Omamit me rezultat 1:0 duke shënuar kështu fitoren e parë historike në lojërat miqësore. Ndeshja u zhvillua në Stadiumin e Qytetit në Prishtinë, në pranë të mijëra simpatizantëve, duke rikthyer kështu shpresat pas dy humbjeve rresht.

Golin në këtë ndeshje e shënoi Imran Bunjaku nga pika e bardh në minutën 84 të lojës. Bunjaku gjuajti zhagas, edhe pse portieri kundërshtar e kuptoi gjuajtjen e topit, por nuk arriti ta kapë, duke ia dhënë Kosovës fitoren e parë historike në ndeshjet e pranuara ndërkombëtarisht nga FIFA.

Ndeshja ishte e një niveli të kënaqshëm, ku gjatë dy pjesëve nuk munguan as seancat për dol, nga të dyja anët. Sidomos në pjesën e parë të dy skuadrat, edhe Kosova edhe Omani patën raste për shënim, por nuk i konkretizuan.    

Pjesa e dytë, ndërkaq filloi me një ritëm të ngadalshëm ku të dyja palët analizonin njëra tjetrën dhe prisnin ndonjë gabim eventual.

Në minutën e 22-të, talenti i Manchester Cityt, Bersant Celina, tentoi ta mposhtë portierin kundërshtar me një goditje dinake nga 20 metra, mirëpo topi përfundoi mbi portë. Po ashtu në këtë pjesë u përshëndet një intervenim i portierit Ujkani, ndërsa nga ana e omanit një lojtar luajti me dorë, por nuk u vërejt nga arbitri.

Selektori i Kosovës, Albert Bunjaku është shpreh të jetë i lumtur që futbollistët e tij e arritën fitoren shumë të dëshiruar nga tifozët, pasi e mposhtën Omanin me rezultat 1:0.

“Jam i kënaqur që tifozëve ua dhuruam fitoren e parë. Por, duhet pranuar se ende jemi larg formimit të një ekipi të fortë, siç e dëshirojmë të gjithë. Mirëpo, duhet kuptuar se jemi në një fazë delikate akoma”, tha Bunjaku, citojnë mediet në Prishtinë.