Kosova po merr pjesë në një nga panairet më të mëdha ndërkombëtare të industrisë ushqimore, SIAL Paris 2026, që po mbahet nga 17 deri më 21 tetor në qendrën e ekspozitave Paris Nord Villepinte, në Francë.
Tetë kompani kosovare po prezantojnë produktet e tyre, me synimin për të zgjeruar eksportet dhe për të krijuar partneritete të reja tregtare, transmeton albinfo.ch.
Panairi SIAL Paris konsiderohet një ndër ngjarjet më të rëndësishme botërore për industrinë e ushqimit dhe pijeve. Në edicionin e këtij viti marrin pjesë rreth 8 mijë ekspozues nga 130 shtete, ndërsa prezantohen afërsisht 400 mijë produkte të ndryshme.
Pjesëmarrja e kompanive kosovare është mundësuar me mbështetjen e Ministrisë së Industrisë, Ndërmarrësisë, Tregtisë dhe Inovacionit (MINTI) dhe Agjencisë për Investime dhe Përkrahjen e Ndërmarrjeve në Kosovë (KIESA).
Në stendën kombëtare të Kosovës prezantohen produkte të ndryshme agroushqimore, përfshirë pije me fruta, kërpudha të egra, reçelra tradicionale, marmelata, erëza dhe produkte të tjera që pasqyrojnë potencialin prodhues dhe eksportues të vendit.
Në ceremoninë e hapjes së panairit mori pjesë edhe ambasadori i Republikës së Kosovës në Francë, Lulzim Hiseni, i cili vizitoi stendën kombëtare dhe zhvilloi takime me përfaqësuesit e të tetë kompanive pjesëmarrëse.
Gjatë këtyre takimeve u diskutua për rëndësinë e pjesëmarrjes në panaire ndërkombëtare, mundësitë e zgjerimit të eksporteve, krijimin e lidhjeve të reja me distributorët francezë dhe zhvillimin e bashkëpunimeve afatgjata.
Ambasadori Hiseni theksoi se diplomacia ekonomike mbetet ndër prioritetet kryesore të Ambasadës së Kosovës në Paris. Ai rikonfirmoi gatishmërinë e institucionit diplomatik për të mbështetur bizneset kosovare në krijimin e kontakteve me partnerë potencialë dhe në identifikimin e mundësive për depërtim në tregun francez.
Mundësi të reja për eksportet kosovare
Pjesëmarrja në SIAL Paris 2026 u ofron prodhuesve kosovarë mundësinë të prezantojnë cilësinë dhe shumëllojshmërinë e produkteve të tyre përpara blerësve, importuesve dhe distributorëve nga vende të ndryshme të botës.
Ky panair shërben gjithashtu si platformë për njohjen me tendencat më të fundit të industrisë ushqimore dhe për krijimin e kontakteve që mund të ndikojnë në zgjerimin e pranisë së produkteve kosovare në tregjet evropiane dhe më gjerë.
Vizitorët e panairit mund t’i gjejnë kompanitë nga Kosova në sallën 4, stenda M104, ku produktet kosovare do të ekspozohen deri më 21 tetor.
