Një tjetër sukses i mërgatës shqiptare në Gjermani është shënuar në skenën politike gjermane.
Ambasadori i Kosovës në Gjermani, Faruk Ajeti, ka bërë të ditur se Elias Cosa, 26-vjeçari me prejardhje nga Podujeva, është zgjedhur anëtar i Kryesisë Federale (Bundesvorstand) të Junge Union, organizatës rinore të CDU/CSU-së.
Sipas Ajetit, Cosa, i cili ka lindur në Bavari, ndërsa babai i tij është nga Podujeva, ka marrë besimin e më shumë se 300 delegatëve në zgjedhjet e mbajtura mbrëmë, transmeton albinfo.ch.
Cosa është aktiv në politikën gjermane prej disa vitesh dhe ka ndërtuar përvojë në nivele lokale, rajonale dhe ndërkombëtare. Që nga viti 2017, ai drejton degën lokale të CSU-së në Bad Bayersoien, ndërsa është angazhuar edhe në Komisionin Ndërkombëtar të Junge Union.
Përveç angazhimit politik, Cosa ka studiuar shkenca politike dhe aktualisht punon në Parlamentin e Bavarisë si referent politik.
Zgjedhja e tij në Kryesinë Federale të Junge Union përbën një tjetër hap të rëndësishëm në karrierën e tij politike dhe vlerësohet si një arritje për mërgatën shqiptare në Gjermani.
