Kosovari provokon policët dhe reziston fizikisht ndaj tyre

Një kosovar 22 vjeçar ka rënë në sy duke iu drejtuar policëve me fjalën: “Baretta” (markë e revoles) dhe duke bërë gjeste që lënë të nënkuptohet se ka me vete një armë

Është e rëndë për t`u besuar, por pikërisht në kohën kur policët ishin në momentet më të rrezikshme të ndërhyrjes, ata u provokuan dhe sulmuan nga qytetarët. Kjo ka ndodhur në natën në mes të të premtes dhe të shtunës (22 dhe 23 korrik) dhe disa orë më vonë, të dielën, më 24 korrik, kur policët janë sulmuar edhe fizikisht, shkruan münchen tv.

Rasti më i rëndë ka ndodhur të dielën, pak pas mesnatës në stacionin hekurudhor të lindjes, transmeton albinfo.ch. Një kosovar 22 vjeçar ka rënë në sy duke iu drejtuar policëve me fjalën: “Baretta” (markë e revoles) dhe duke bërë gjeste që lënë të nënkuptohet se ka me vete një armë. Pas kontrollimit, te ai nuk u gjet asnjë armë.

Por, i riu nuk u mjaftua me provokimin që kishte bërë më parë. Ai, duke qenë edhe nën ndikimin e alkoolit (0.92 promilë) ka sulmuar policët duke provuar t`i godiste me bërryla në fytyrë, përcjell albinfo.ch. Kur policët donin ta arrestonin, ai po rezistonte me forcë duke provuar t`i godasë policët me kokë.