Kosovë: Detaje nga grabitja e armatosur që përfundoi me vrasje

Bëhet e ditur se një grabitje e armatosur në rrugën “Mbretëresha Teutë” në Mitrovicë, ka përfunduar me vrasje. I vdekur ka mbetur pronari i lokalit, meqenëse s’ka mundur t’u mbijetojë plagëve të marra.

Lajmin për vdekjen e tij e ka konfirmuar zëdhënësja e Spitalit të Mitrovicës, Nita Mustafa-Hakaj.

“Mund të konfirmoj se një person i plagosur, që kishte ardhur për trajtim, ka ndërruar jetë. Meqë tash ka ndodhur e gjithë ngjarja, nuk mund të deklaroj informacione të tjera”, ka deklaruar mbrëmë Mustafa-Hakaj.

Detaje për grabitjen ka dhënë edhe zëdhënësi i Policisë së Kosovës për Rajonin e Mitrovicës, Avni Zahiti.

Ai ka thënë se nga hetimet fillestare bëhet e ditur se dy persona të dyshuar e të maskuar, nën kërcënimin e armës, kanë tentuar të grabitin viktimën, i cili ndodhej në dyqanin e tij, si pasojë e të shtënave nga të dyshuarit në drejtim të viktimës, viktima ka mbetur i plagosur.

Dy të dyshuarit janë arrestuar si dhe është sekuestruar një armë.