Kosovë: Konfiskohen 272 aparate të prodhimit të kriptovalutave

Autoritetet policore të Kosovës kanë zhvilluar sot një aksion policor në veri të Kosovës, duke konfiskuar aparate të prodhimit të kriptovalutave, shkruan Albinfo.ch.

Lajmin e ka dhënë ministri i Punëve të Brendshme, Xhelal Sveçla.

“Sot, në orët e para të mëngjesit, pas kërkesës së Doganave të Kosovës, Policia e Kosovës ka organizuar aksionin e zbulimit dhe konfiskimit të pajisjeve për minim të kriptovalutave.
Në këtë aksion në afërsi të fshatit Trebice të komunës së Leposaviqit u konfiskuan 272 nga këto lloj pajisjesh dhe është arrestuar një person. Gjithë aksioni u zhvillua dhe përfundoi pa incidente.
Aksione të këtilla do të vazhdojnë deri në implementimin e plotë të vendimit të Kuvendit dhe Qeverisë së Republikës”, ka shkruar Sveçla, përcjell Albinfo.ch.

Ndryshe, prej pasluftës në veri të Mitrovicës nuk paguhet energjia elektrike. Së fundmi është shndërruar në një zonë ku prodhohen kriptovaluta, duke u nisur nga fakti se për krijimin e tyre shpenzohet energji e madhe elektrike.

Pikërisht për këtë, Qeveria e Kosovës ka vendosur ditë më parë të ndalojë prodhimin e kriptovalutave në gjithë territorin e Kosovës.