Kosovë: Nga sot nis zbatimi i masave të reja

KEYSTONE 2019

Sot zyrtarisht fillon zbatimi i masave të reja kundër përhapjes së pandemisë Covid-19, që ka ndërmarrë Qeveria e Kosovës në mbledhjen e mbajtur dje.

Në kuadër të këtyre vendimeve, Qeveria e bëri të obligueshme bartjen e maskave nga të gjithë qytetarët jashtë shtëpive të tyre, si dhe mbajtjen e distancës fizike prej 2 metrave në ambiente të përbashkëta, jashtë shtëpive/banesave, shkruan albinfo.ch.

Për ata që nuk i respektojnë këto masa, u paralajmëruan edhe dënime të ashpra.

Nga sot (e martë), Policia e Kosovës do të nisë shqiptimin e gjobave për të gjithë ata, të cilët nuk i respektojnë vendimet e marra nga Qeveria e Kosovës në kuadër të luftimit të pandemisë COVID-19.

Sipas zyrtarëve policorë, dënimet për ata që nuk i respektojnë masat do të shkojnë nga 2 vjet deri në 12 vjet burgim, ndërsa për kundërvajtje sipas Ligjit për parandalimin e sëmundjeve ngjitëse deri në 8 mijë euro gjobë.

Policia nga sot do të punojë me orar të zgjatur 12 orë.

Ndryshe,  mbrëmë Instituti Kombëtar i Shëndetësisë Publike të Kosovës ka njoftuar edhe për 187 raste të reja dhe gjashtë vdekje nga COVID-19.