Kosovë: Policia nis hetimet për vdekjet e dyshimta në Klinikën Infektive

Policia e Kosovës ka nisur hetimet për, për zbardhjen e rastit të 6 personave të infektuar me COVID-19, të cilët kishin ndërruar jetë dje në Klinikën Infektive, vdekja e të cilëve u cilësua si e dyshimtë, shkruan albinfo.ch.

“Prishtinë 05.07.2020 – 01:00. Raportohet se në Kliniken Infektive në Prishtinë kanë vdekur gjashtë persona që të gjithë kosovar. Me vendim të prokurorit, trupat e pa jetë të viktimave dërgohen në Institutin e Mjekësisë Ligjore për Obduksion. Rasti është duke u hetuar”, thuhet në raportin e Policisë së Kosovës.

Organet e hetuesisë a as Klinika Infektive e QKUK’së e Ministria e Shëndetësisë, ende nuk kanë dhënë asnjë version sa i përket kësaj çështjeje.

Dyshimet e para ishin se ata mund të kenë ndërruar jetë nga mungesa e oksigjenit.

Ndërsa gjatë ditës së djeshme Ministria e Shëndetësisë dhe Shërbimi Spitalor dhe Klinik Universitar i Kosovës kanë dalë me një komunikatë të përbashkët pas ngjarjeve në Klinikën Infektive.

MSH’ja njoftoi se pacientët që ndërruan jetë mbrëmjen e së dielës në Infektivë ishin në gjendje të rëndë me COVID-19, pa dhënë informata të tjera.

Po ashtu kryeministri, Avdullah Hoti nuk ka dhënë ndonjë informatë shtesë se si ka ndodhur e gjithë kjo ngjarje. Ka thënë se për këtë çështje do të merren organet e hetuesisë kosovare.