Kosovë: Policia nis qortimin e shoferëve që qarkullojnë me automjete me targa ilegale

Nga orët e hershme të mëngjesit të sotëm Policia e Kosovës ka nisur zbatimin e vendimit të Qeverisë së Kosovës për sa i përket qarkullimit me targa ilegale në territorin e Republikës së Kosovës.

Në pjesën veriore të vendit Policia është duke lëshuar letra qortuese për secilin shofer makine me targa të paligjshme serbe, që hyn apo del nga territori i Kosovës drejt Serbisë, raportojnë mediat në Kosovë.

Në përgjithësi llogaritet se janë rreth 10.000 automjete me targa që Kosova i konsideron të paligjshme dhe ato qarkullojnë kryesisht në veriun e Kosovës, të banuar me shumicë serbe.

Faza e parë përfshin qortimin e shoferëve, e dyta parasheh gjobë deri në 150 euro për ata shoferë, dhe e treta targa provuese.

Zbatimi i këtij plani pritet të përfundojë më 21 prill dhe, nga ajo datë, në qarkullim do të lejohen vetëm makinat me targa RKS.