Kosovë, arrestohen shtatë zyrtarë për “subvencione”

Shtatë zyrtarë të Agjencisë për Zhvillimin e Bujqësisë në kuadër të Ministrisë së Bujqësisë janë prangosur sot, në vazhdimësinë e aksionit “Subvencioni 2021”. Zyrtarët e arrestuar dyshohen për keqpërdorim të detyrës zyrtare dhe marrje ryshfeti në ndarjen e subvencioneve, përcjell albinfo.ch.

Pritet arrestimi edhe i personave të tjerë, në komuna të ndryshme të vendit. Gjatë ditës pritet arrestimi i së paku 15 personave.

Policia e Kosovës të mërkurën ka vazhduar aksionin e nisur muaj më parë nën dyshime për keqpërdorime në subvencione në bujqësi. Aksioni policor tashmë ka nisur në Agjencinë për Zhvillimin e Bujqësisë, ku në muajin shkurt u arrestuan zyrtarë të shumtë me dyshimet për keqpërdorim të detyrës zyrtare – dhënie e marrje ryshfeti.

Në aksionin e asaj kohe ishin sekuestruar edhe vetura e ishin gjetur valixhe me para.

Aksioni do të zhvillohet pos në AZHB, edhe nëpër komuna të Kosovës.

Aksioni i sotëm është nisur bazuar në provat që janë nxjerrë nga telefonat e sekuestruar muaj më parë të zyrtarëve të arrestuar e që flasin për afera korrupsioni e ryshfet për ndarje subvencionesh.

Pritet arrestimi i dhjetëra zyrtarëve të tjerë.