Kosovë: Protestojnë punëtorët e sektorit privat

Sindikalistët ngrisin shqetësimet për ikjen e punëtorëve jashtë vendit

Në Ditën ndërkombëtare të punëtorëve, në Prishtinë është mbajtur protesta e organizuar nga Federata Sindikale e Punëtorëve të Sektorin Privat. Kryetari Jusuf Azemi tha se sot punëtorët e Kosovës janë ata që e mbajnë shtetin.

“Sindikata ka luftuar për të gjithë punëtorët e Kosovës, por realisht ajo qeveri që na premtoi deri më tani nuk i ka realizuar premtimet e veta. Zoti kryeministër na keni njollosur dhe baltosur. Nevoja e juaj do të jetë më e madhe për ne, sesa ju për neve”, tha Azemi.

Në këtë protestë është kritikuar kryeministri Kurti dhe Qeveria e tij.

“Nuk ndodh asnjë vend në botë që një kryeministër të mos pretë në takim sindikatat”, tha ai.

Sipas tij, është shqetësuese që po largohen punëtorë nga Kosova dhe mjafton të shikohet numri i atyre që po aplikojnë për viza nëpër ambasada të huaja.

---