Kosovë: Reagon Basri Sejdiu, drejtori i shkarkuar dje

Drejtori i shkarkuar i Shërbimit Spitalor Klinik Universitar të Kosovës (ShSKUK), Basri Sejdiu, pas shkarkimit të tij ka mbajtur një konferencë për media, ku ka folur për shkarkimin e tij.

Ai ka thënë se është shkarkuar nga posti pa asnjë paralajmërim, ndërsa e ka quajtur vendimin politik. Për këtë gjë ai paralajmëroi se do të bëjë ankesë në Inspektoratin e Punës dhe Gjykatën kompetente, shkruan albinfo.ch.

“U drejtohem qytetarëve dhe pacientëve për realitetin. Bordi dje pa paralajmërim më sjellin një vendim për shkarkimin tim. Është vendim politik. Asnjë vendim nuk lidhet me menaxhimin tim. Raporti i auditorit është i vitit të kaluar, të cilat vetë i kemi iniciuar. Nuk janë të gjeturat që mund të bazohet bordi për shkarkimin tim. Parregullsia tjetër e bordit është që ka anëtarë, të cilët kanë nënshkruar dhe kanë munguar”, ka thënë Sejdiu.

Ai po ashtu tha se do t’i padisë të gjithë ata që e kanë etiketuar për keqmenaxhim në SHSKUK.