Kosovë, vazhdon operacioni kundër policëve të korruptuar

Bëhet e ditur se në orët e hershme të mëngjesit të sotëm, IPK-ja, në koordinim të plotë me Prokurorinë Speciale, kanë filluar operacionin e gjerë të koduar me emrin “Pika 2” ndaj zyrtarëve policorë lidhur me veprat penale “marrje e ryshfetit” dhe “keqpërdorim i pozitës apo autoritetit zyrtar”, përcjell albinfo.ch.

Ky operacion i ka paraprirë një hetimi rreth njëvjeçar nën dyshimin për përfshirje në aktivitete të kundërligjshme të një numri të policëve.

“Ky hetim është duke u zhvilluar në koordinim të plotë dhe udhëheqjen nga Prokuroria Speciale e Republikës së Kosovës (PSRK), duke përfshirë edhe masa të fshehta të hetimit. Hetimi përfshin edhe bashkëpunim me prokurorë nga SPAK-u (Struktura e Posaçme kundër korrupsionit dhe krimit të organizuar e Republikës së Shqipërisë) dhe zyrtarët e AMP-së, Agjencisë për Mbikëqyrje Policore (agjencia homologe e IPK-së në Shqipëri)”, thuhet në komunikatë.

Në operacionin e mëhershëm me emrin e koduar “Pika” u arrestuan 50 policë në pikat kufitare “Qafë Prushë” dhe “Qafë Morinë”, ndërkaq 18 zyrtarë policorë ndodhen në arrati.