KQZ-ja pret Supremen që ta shpallë rezultatin

Lëvizja Vetëvendosje është ankuar dje në Gjykatë Supreme për 1806 fletëvotimet e mërgatës

Komisioni Qendror i Zgjedhjeve është duke pritur vendimin e Gjykatës Supreme për ankesat që ka bërë dje Lëvizja Vetëvendosje për votat e ardhura nga diaspora. Kështu ka bërë të ditur KQZ-ja në një përgjigje për Gazetën Express.

Nga KQZ-ja zëdhënësi Valmir Elezi ka thënë se aktualisht nuk mund të shpallen rezultatet përfundimtare, sepse duhet të priten çështjet që janë parashtruar në institucionet e tjera.

“Aktualisht Komisioni Qendror i Zgjedhjeve nuk mund t’i shpallë rezultatet përfundimtare, sepse duhet të presim përfundimin e të gjitha çështjeve që mund të jenë parashtruar në institucionet tjera. Pra, para se të procedojmë me shpalljen e rezultateve përfundimtare, KQZ-ja kërkon konfirmim nga Paneli Zgjedhor për Ankesa dhe Parashtresa dhe nga Gjykata Supreme se nuk kanë ndonjë çështje për të shqyrtuar apo vendosur. Vetëm pasi të kemi këto konfirmime, KQZ-ja mund të shpallë rezultatet përfundimtare”, ka thënë Elezi, derisa ka konfirmuar se tani ka mbetur vetëm ankesa e VV-së në Gjykatën Supreme, përcjell Albinfo.ch.

“Jemi në pritje të vendimit të Gjykatës Supreme lidhur me ankesën që është parashtruar”, ka deklaruar ai.

Lëvizja Vetëvendosje është ankuar dje në Gjykatë Supreme për 1806 fletëvotimet e mërgatës, të cilat nuk janë numëruar.

---