KQZ: Rezultatet preliminare të zgjedhjeve do të dihen shumë shpejt

Për dallim prej herave të tjera, në këto zgjedhje parlamentare do të dihen shumë më shpejt. Kështu ka bërë të ditur në konferencë për media zëdhënësi i KQZ-së, Valmir Elezi.

Fillimisht do të bëhet numërimi vetëm i votave për subjektet politike. Prandaj, KQZ pret të publikojë shpejt rezultatet preliminare, raporton Express, përcjell Albinfo.ch.

“Po shpresojmë që, duke pasur parasysh që numërimi i fletvotimeve në vendvotime do të bëhet vetëm për pjesën e fletvotimit ku qytetarët kanë përzgjedhur subjektet politike, do të bëhet më shpejt – sepse nuk do të kemi numërimin e pjesës së fletvotimit ku qytetarët kanë përzgjedhur edhe kandidatët për deputetë, po shpresojmë që brenda një kohe të shpejtë të arrijmë t’i kemi rezultatet preliminare nga vendvotimet për subjektet politike”, tha Elezi.

Për kohën e saktë tha se nuk mund të flasë.

“Sigurisht që do t’ju njoftojmë, por do të mund ta shihni edhe në web-faqen e KQZ-së kur të dhënat nga vendvotimet fillojnë të vijnë e të shfaqen dhe dalngadalë do të mund të shihni përditësimin e tyre dhe votat për secilin subjekt politik garues”, tha Elezi.

Ai tha se kjo do të varet nga ecuria e numërimit të fletvotimeve në vendvotime dhe ngarkimit të këtyre të dhënave nga zyrtarët tanë që janë në këto qendra votimi./Albinfo.ch/