Kreditë për bujqësi të shtrenjta

Bujqësia është sektori që më së paku është kredituar nga institucionet financiare në Kosovë. Edhe ato pak kredi që janë lëshuar, kanë pasur normën e interesit më të lartën krahasuar me sektorë të tjerë.

Kryeministri Hashim Thaçi, në mandatin e parë të tij kishte premtuar krijimin e një fondi për subvencionimin e normave të interesit për kredit për bujqësi, në mënyrë që kreditimi për këtë sektor të rritej. Për këtë fond një kohë të gjatë nuk ishte folur fare, por tash në Ministrinë e Bujqësisë thonë se realizimi i një projekti të tillë është në fazën finale, shkruan Koha Ditore.

Madje, sipas kësaj gazete në Ministri thonë se po punohet, që përveç fondit të ketë edhe subvencionim të normave të interesit për kreditë bujqësore.

Adil Behramaj, zëdhënës i MBPZHR-së, ka thënë se është në proces krijimi i një fondi garantues për kredi bujqësore, i cili, sipas tij, deri në mesin e vitit 2012 planifikohet të funksionalizohet.

Banka Qendrore e Kosovës ka publikuar “Raportin e Stabilitetit Financiar të Kosovës”, në të cilin thuhet se bujqësia mbetet sektori që më së paku është kredituar.

Sipas BQK-së, ky nivel i ulët i kreditimit vë në pah se qasja konservatore e sistemit bankar kundrejt sektorit të bujqësisë nuk ka shënuar ndonjë përparim përgjatë viteve të fundit.

Në raport gjithashtu thuhet se kreditë e lëshuara për sektorin e bujqësisë karakterizohen me normat më të larta të interesit, që sipas BQK-së reflekton nivelin e lartë të pasigurisë së bankave lidhur me kreditimin e këtij sektori