Kriptovalutat shënojnë rritje rekorde

Analistët thonë se institucionet financiare kërkojnë të jenë pjesë e kësaj rritjeje, ndërkohë që organet rregullatore nuk po ashpërsohen shumë

Bitcoin është rritur drejt nivelit më të lartë të të gjitha kohërave në nisje të javës dhe kriptovalutat e tjera ndoqën me optimizëm, prej fluksit të investimeve, lajmeve pozitive dhe shqetësimeve mbi inflacionin.

Bitcoin u rrit me mbi 4% në 66,170 dollarë, duke iu afruar nivelit rekord të arritur më 20 tetor në mbi 67,000 dollarë, ndërsa Ethereum shënoi nivelin më të lartë të të gjitha kohëve prej 4,768 dollarë. Ethereum është rritur me rreth 59% që prej fillimit të nëntorit, ndërsa Bitcoin me 51% , ndërkohë që investitorët kanë ndjekur me optimizëm prezantimin e një fondi të listuar në bursë në SHBA që ndjek Bitcoin, shkruan SCAN, përcjell albinfo.ch.

Rënia e interesave në aktivet e borxhit, ndërkohë që tregtarët përballen me inflacion të lartë, ka shtuar tërheqjen e aktiveve të tjera, si ari dhe kriptovalutat, që nuk paguajnë kupon.

Analistët thonë se institucionet financiare kërkojnë të jenë pjesë e kësaj rritjeje, ndërkohë që organet rregullatore nuk po ashpërsohen shumë.

Në javët e fundit, banka më e madhe e Australisë bëri të ditur se do të ofrojë tregti në kriptovalutë për klientët retailë, ndërsa autoritetet në Singapor kanë qenë pozitiv ndaj kriptovalutës.

Humori pozitiv në tregjet e aksioneve është përhapur gjithashtu te kriptovalutat.

Javën e kaluar, kryebashkiaku i zgjedhur i Nju Jorkut, Eric Adams, tha se do të marrë 3 pagat e para në Bitcoin dhe bëri të ditur qëllimin e tij për të kthyer qytetin në “qendrën e industrisë së kriptovalutave”, duke ndjekur një premtim të ngjashëm nga kryebashkiaku i Majamit.

---