Kroacia dhuron rreth 10 mijë vaksina anti-COVID për Kosovën

Photo alirazagurmani9272

Sot, Ministrja e Punëve të Jashtme dhe Diasporës, Donika Gërvalla, ka pritur në takim homologun e saj nga Kroacia, Gordan Grlić Radman, përcjell albinfo.ch.

Ky takim i mbyllur për media është mbajtur në zyrën e ministres së Punëve të Jashtme. Pas këtij takimi, Gërvalla dhe Radman kanë folur në konferencë para gazetarëve.

Grlić Radman njoftoi për 10 mijë vaksina për Kosovën.

“Kroacia dhe Kosova siç tha edhe ministrja janë vende tradicionalisht mike që kanë marrëdhënie të shkëlqyeshme mes vete. Sot kam nder që me stafin tim të jem këtu në Kosovë. Kjo vizitë do të shërbejë për intensifikimin e marrëdhënieve.

Nuk duhet të harrojmë faktin se pikërisht Kroacia ishte një nga vendet e para që e ka njohur pavarësinë e Kosovës, dhe për këtë jemi shumë krenarë. Kam informuar ministren për vendimin e Kroacisë për dhurimin e 10 mijë vaksinave për luftimin e pandemisë. E di që kjo do të jetë e rëndësishme për jetën e qytetarëve të Kosovës”, u shpreh ndër të tjera ai.