Kryeministri i Kosovës kundërshton ligjin për paga, pasi ai ua zvogëlon pagat gjyqtarëve

Kryeministri Ramush Haradinaj ka kundërshtuar vendimin e Komisionit Parlamentar për ta proceduar Ligjin për paga, pasi thotë se me të gjyqtarëve e prokurorëve u zvogëlohet paga. Haradinaj shkroi se është i shqetësuar me vendimin e Komisionit Parlamentar për ta proceduar Ligjin për paga. Ai u bëri thirrje komisionit,

Kuvendit dhe deputetëve që të mos e dëmtojnë sistemin e drejtësisë dhe të reflektojnë, duke u bërë bashkë në mbrojtje të sundimit të ligjit. E, me kryeministrin është pajtuar edhe ministri i Drejtësisë, Abelard Tahiri, përcjell albinfo.ch

Nëpërmes një komunikate për media, Tahiri deklaroi se ulja e pagave për gjyqtarët e prokurorët rrezikon pavarësinë e sistemit gjyqësor në vend. “Jam tejet i shqetësuar me faktin se parametrat rregullativë të vendosur në këtë projektligj kanë prekur dhe degraduar pagat e gjyqtarëve dhe prokurorëve, duke tjetërsuar konceptin e pavarësisë së sistemit gjyqësor si pushtet i tretë dhe i pavarur. Kam shprehur dhe shpreh mospajtimin tim të plotë me propozimet e dhëna në projektligj, të cilat cenojnë pavarësinë e gjyqësorit”, deklaroi Tahiri.