Kryetari ukrainas Zelensky pret “hapa të qartë mbështetjeje” nga partnerët

"Kufijtë ndërkombëtarë të Ukrainës do të mbeten në vend pavarësisht deklaratave ruse", është shprehur Zelensky në një fjalim drejtuar kombit

Presidenti ukrainas Volodymyr Zelensky ka kritikuar në mënyrë të ashpër Rusinë për njohjen e rajoneve separatiste në Ukrainën lindore si të pavarura.

Kufijtë ndërkombëtarë të Ukrainës do të mbeten në vend pavarësisht deklaratave ruse, është shprehur Zelensky në një fjalim drejtuar kombit.

Rusia po shkel integritetin dhe sovranitetin e Ukrainës, ka thënë ai.

Ukraina pret një përgjigje të vendosur nga BE. Këtë e tha ministri i jashtëm ukrainas pas bisedimeve me kryediplomatin e BE-së, Josep Borell, transmeton albinfo.ch.

E përballur me një luftë të mundshme me Rusinë, Ukraina, para Kombeve të Bashkuara është zotuar për rezistencë.

“Ne do të qëndrojmë të vendosur. Jemi në terrenin tonë. Ne nuk kemi frikë nga asgjë dhe nga askush. Ne nuk i detyrohemi askujt asgjë dhe nuk i japim askujt asgjë”, ka thënë ambasadori i Ukrainës në OKB, Serhiy Kyslytsia, në mbledhjen urgjente të Këshillit të Sigurimit të OKB-së.

“Nuk është shkurt 2014. Është shkurt 2022,” tha ai, duke iu referuar aneksimit të Krimesë nga Rusia.

---