Kurti dhe Osmani bëjnë homazhe në Prekaz

Shënimi i 22-vjetorit të Epopesë së UÇK-së dhe rënies së komandantit legjendar Adem Jashari është duke vazhduar edhe sot me aktivitete të ndryshme.

Sot, Kryeministri i vendit, Albin Kurti dhe kryetarja e Kuvendit, Vjosa Osmani, kanë bërë homazhe në kompleksin memorial “Adem Jashari” në Prekaz.

Kryetarja e Kuvendit të Kosovës, Vjosa Osmani, tha se sot janë në Prekaz për ta nderuar sakrificën e familjes Jashari dhe të atyre që luftuan për lirinë e vendit, njofton Klan Kosova.

“Jo vetëm në këto data, në çdo ditë, në çdo moment duhet ta përkujtojmë këtë sakrificë të familjes Jashari që i ka vënë themelet shtetit tonë”.

“Kjo ka ndërkombëtarizuar çështjen e Kosovës para botës se popullo shqiptar ishte i shtypur nga ana e regjimit totalitar serb”, tha Osmani.

Ata ishin të shoqëruar nga ushtarët  e FSK-së dhe komandati Rrahman Rama, njofton Klan Kosova.

Kurti pati edhe kabinetin e tij qeveritar, bashkë me ata ishte edhe Kryetari i Komunës së Skenderajt, Bekim Jashari.

Pas kësaj, ata do të vizitojnë shtëpitë e Jasharajve, ku do të priten nga Rifat Jashari.

Ndërsa në ora 12:00 do të bëhen homazhe në të gjitha komplekset memoriale të dëshmorëve të UÇK-së.

Në ora 17:00 pritet të mbahet akademi përkujtimore kushtuar komandantit legjendar Adem Jashari, të pranishmëve u drejtohen me fjalim presidenti i Kosovës, Hashim Thaçi, kryetarja e Kuvendit Vjosa Osmani dhe kryeministri Albin Kurti.

---