Kryeministri i Kosovës, Albin Kurti, ka vlerësuar si “arritje të jashtëzakonshme” rezultatin preliminar të Koalicionit Shqiptar në zgjedhjet në Preshevë, Bujanoc dhe Medvegjë, duke bërë të ditur se koalicioni ka siguruar dy mandate të projektuara në Kuvendin e Serbisë, ndërsa gara për mandatin e tretë mbetet e hapur.
Sipas deklaratës së Kurtit, Koalicioni Shqiptar ka marrë gjithsej 27.230 vota në këto tri komuna. Ai ka theksuar se, pas aplikimit të rritjes prej 35 për qind të koeficientëve zgjedhorë për pakicat kombëtare, kjo shifër përkthehet në ekuivalentin e 36.761 votave për përllogaritjen e mandateve.
Kurti ka vlerësuar se bashkimi politik i shqiptarëve po shndërrohet në përfaqësim më të fuqishëm parlamentar në Serbi.
Në deklaratën e tij, ai është ndalur edhe te zhvillimet në skenën politike serbe, duke pretenduar se presidenti Aleksandar Vučić ka pranuar humbjen përballë Listës Studentore. Sipas Kurtit, edhe lista e udhëhequr nga Ivica Dačić, bazuar në projeksionet preliminare, rrezikon të mbetet nën pragun zgjedhor prej tre për qind.
Në fund të deklaratës, Kurti ka uruar qytetarët dhe subjektet politike shqiptare në Preshevë, Bujanoc dhe Medvegjë, duke vlerësuar se bashkimi i tyre ka kontribuar në këtë rezultat/albinfo.ch/
