Kryeministri i Kosovës, Albin Kurti, është pritur nga kryeministri i Irlandës, Micheál Martin, në nisje të takimit të Komunitetit Politik Evropian (EPC), që po mbahet në Dublin, përcjell albinfo.ch.
Në deklarimin e tij për media, Kurti tha se Kosova synon anëtarësimin në Bashkimin Evropian dhe NATO, por theksoi se fillimisht vendi duhet të marrë statusin e kandidatit dhe të hapë negociatat për anëtarësim.
Ai shprehu pritjen që Kosova të mbështetet nga presidenca irlandeze për të avancuar në rrugën drejt integrimit evropian.
Kurti falënderoi gjithashtu popullin irlandez për strehimin e më shumë se një mijë refugjatëve shqiptarë nga Kosova në vitin 1999, të cilët ishin dëbuar nga vendi gjatë luftës.
Ai vlerësoi edhe kontributin e ushtarëve dhe oficerëve irlandezë që kanë shërbyer në kuadër të KFOR-it për më shumë se dy dekada, duke ndihmuar në ruajtjen e paqes dhe sigurisë në Kosovë.
Duke folur për rëndësinë e takimit të EPC-së, Kurti tha se bashkërendimi i qëndrimeve ndërmjet liderëve evropianë është veçanërisht i rëndësishëm në rrethanat aktuale të sigurisë, për shkak të vazhdimit të agresionit rus në Ukrainë dhe kërcënimeve hibride ndaj infrastrukturës kritike.
Sipas tij, takime të tilla ndihmojnë liderët të diskutojnë sfidat e përbashkëta dhe të bashkojnë përpjekjet për përballimin e tyre./Albinfo.ch
