Kurti: Nga 100 euro shtesë në prill për punëtorët e sektorit privat, publik, pensionistët dhe studentët

Murati tregon se kur pritet të dalin shtesat prej 100 eurosh për sektorin privat dhe studentët

Kryeministri Albin Kurti ka prezantuar sot Pakon e re të ndihmave, në një konferencë për media.

Gjatë fjalimit, Kurti ka thënë se për muajin prill do ta dyfishojnë vlerën e asistencës sociale.

Për këtë muaj, pensionistëve do t’iu shtohen nga 100 euro shtesë.

Nga 100 euro do t’iu ndahen edhe punëtorëve të sektorit privat dhe atyre të sektorit publik.

Me nga 100 euro do të mbështeten edhe studentët.

Vlera totale e kësaj pakoje është mbi 100 milionë euro, dhe, sipas Kurtit, do të përfitojnë rreth 800 mijë qytetarë.

Për muajin prill do ta dyfishojmë vlerën e asistencës. Pensionistëve do t’u ndahen nga 100 euro shtesë për muajin prill, dhe do të përfitojnë të gjithë ata që marrin pension. Për herë të parë, do të mbështesim me 100 euro të gjithë punëtorët e sektorët privat. Në kuadër të kësaj pakoje do të ndahen edhe nga 100 euro për mbi 80 mijë zyrtarë publikë. Për herë të parë do të mbështeten të gjithë studentët me nga 100 euro. 80 mijë studentë do të përfitojnë nga kjo… Vlera totale e kësaj është mbi 100 milionë euro, do të përfitojnë rreth 800 mijë qytetarë ose praktikisht secila familje”, ka deklaruar Kurti.

Nga ana tjetër, ministri i Financave, Hekuran Murati, tha se shtesa prej 100 eurosh për pensionistët dhe punëtorët e sektorit publik për muajin prill mund të ekzekutohet menjëherë. Por, për punëtorët e sektorit privat dhe studentët duhet të hapet një aplikim.

“Në radhë të parë do të jenë pensionistët që do ta marrin këtë mbështetje shtesë, pastaj do të jenë ata të sektorit publik, kurse për punëtorët e sektorit privat dhe studentët gjatë ditëve në vijim do të hapim procesin e aplikimit, pasi nuk i kemi të dhënat e llogarive bankare”, është shprehur Murati.

---