Kurti u shkruan për takim kryetarëve të partive të tjera

Kryeministri në detyrë i Kosovës, Albin Kurti, u ka dërguar ftesa të reja për takim kryetarëve të partive të tjera.

Burime të KOHËS kanë thënë se Kurti u ka dërguar ftesat kryetarit të LDK-së, Lumir Abdixhiku, të PDK-së, Bedri Hamza, e atij të Aleancës Ardian Gjini.

Kurti nuk ka caktuar datë për takim, por e ka lënë të hapur kohën për kur të jenë të gatshëm kryetarët e tjerë të partive., transmeton albinfo.ch.

Deputetja e PDK-së, Blerta Deliu, është përgjigjur shkurt se “është çështje e mbyllur”, kur u pyet nëse Hamza do t’i përgjigjet pozitivisht ftesës së Kurtit.

Kurti u ka dërguar disa herë ftesa kryetarëve të partive për të diskutuar lidhur me formimin e institucioneve, veçanërisht për çështjen e presidentit. Kuvendi ende nuk e ka përfunduar konstituimin pas zgjedhjeve të 7 qershorit. Seanca konstituive nisi më 6 gusht, por deputetët nuk arritën ta përfundonin zgjedhjen e kryetarit dhe të nënkryetarëve.

Vazhdimi i seancës konstituive më 8 gusht nuk prodhoi rezultat, pasi sërish me kërkesën e Kurtit që t’i jepej kohë bisedimeve ndërpartiake, ajo u ndërpre për kohë të pacaktuar.

LVV-ja kërkon që paraprakisht të arrihet marrëveshje për çështjet kryesore politike, përfshirë edhe zgjedhjen e presidentit të ardhshëm.

PDK-ja dhe Aleanca thonë se kalimi i afatit për konstituim të Kuvendit nuk e heq detyrimin për vazhdimin dhe përfundimin e seancës konstituive.