Largohet taksa rrugore për Shqipëri

Tragjedia e shkaktuar dje nga tërmeti që goditi Shqipërinë ka mobilizuar mijëra qytetarë të Kosovës për t’iu dërguar ndihma me autobusë, vetura e mjete të tjera vëllezërve shqiptarë që përjetuan tmerrin.

Por, të gjithë qytetarëve që kanë shkuar për Shqipëri u është dashur të paguajnë taksën rrugore të vendosur nga Qeveria e Shqipërisë.

Pas kritikave të shumta, tani kjo taksë është larguar për të gjithë ata që nisën për të ndihmuar qytetarët e Shqipërisë.

Një gjë të tillë së paku është konfirmuar nga ambasadori i Shqipërisë në Kosovë, Qemal Minxhozi, i cili paraprakisht kishte shprehur keqardhje që taksa rrugore po aplikohet edhe këto ditë.

“Po ju informoj se tashmë taksa rrugore është hequr dhe nuk do të paguajë askush që shkon për të ndihmuar”, ka thënë për FaktePlus ambasadori Minxhozi.

E që taksa rrugore është hequr e kanë thënë edhe nga shoqëria koncesionare e autostradës Milot – Morinë (Rruga e Kombit), duke filluar që nga dita e djeshme, datë 26.11.2019, ka lejuar kalimin pa pagesë të të gjithë makinave.

“Individë, shoqata, institucione të Kosovës, Shqipërisë etj., të cilët janë solidarizuar apo që kanë sjellë ndihma për të prekurit nga tërmeti. Këto grup personash do të lejohen të kalojnë pa pagesë deri në përfundim të situatës emergjente”, thuhet nga kompania.