LDK shkarkon Vjosa Osmanin nga pozitat në parti

EPA/STRINGER

Kryetari i Lidhjes Demokratike të Kosovës, Isa Mustafa, sot ka propozuar që të shkarkohet Vjosa Osmani nga pozita e nënkryetares së partisë.

Mustafa nëpërmjet një letre që i ka drejtuar Këshillit të Përgjithshëm të partisë së tij, kërkoi që pozitën e Osmanit ta marrë kryeministri Avdullah Hoti.

Lajmin e ka konfirmuar deputeti nga radhët e LDK-së, Haxhi Avdyli, nëpërmjet një postimi në Facebook, i cili vendimin e shkarkimit nëpërmjet email-it e quajti skandaloz.

“Votimi përmes email-it është një vendim mashtrues dhe frikacak si gjithmonë i disa njerzëve që s’kanë guxim qytetar të maten e thirren si pronarë të LDK-së. Këta s’e kanë problem edhe t’i manipulojnë rezultatet. Ekziston mundësia që rezultatet e këtij sondazhi online mund të jenë manipuluar, prandaj s’ka vlerë as juridike, as obligativ për askënd”, shkroi Avdyli.

“Ne dhe secili aktivist i LDK-së do ta konsiderojë këtë vetëm si një sondazh të pavlerë, derisa ky vendim të mos mirret konform rregullave demokratike”, përcjell Albinfo.ch.